گروپى پاڵپشتیی پڕۆژەى خێزانەکەم

گروپی پاڵپشتیی، سەکۆیەکی ڕۆشنبیریی – پەروەردەییە، ئەو دایک و باوک و هاوسەرانەى لەخۆگرت کە لە خولەکانی “پاکێجی هۆشیاریی خێزانی“دا بەشدارییان کردووە. ئامانج لەم گروپە برەودان بوو بە کولتووری هۆشیاریی کۆمەڵایەتیی و پاڵپشتیکردنی بەهاکانی خێزانی تەندروست و کاریگەر. بە بانگهێشتکردنى پسپۆڕانى بوارەکە چەند بابەتێکی هەنووکەیی لە بواری خێزان و پەروەردەدا دەخاتە بەر باس و گفتوگۆ.

لە سیمینارى یەکەمدا بە میوانداریی بەڕێز دکتۆر فەهمی عەلی، پسپۆڕی نەخۆشییە دەروونییەکان و مامۆستای زانکۆ، لە دیدارێکدا کە زیاتر لە دوو کاتژمێری خایەند و تایبەت بوو بە ناساندنی نەخۆشییە دەروونییەکان، بەڕێزیان تیشکیان خستە سەر باوترین جۆری نەخۆشییە دەروونییەکان. هەروەک چۆن جەخت کرایەوە سەر گرنگیی ڕۆڵی هۆشیاریی دەرووندروستیی لە خۆپاراستن و مامەڵەکردن لەگەڵ گرفتە دەروونییەکاندا. 

سیمیناری “گرنگیی قەرەبووکردنەوە و بونیادنانەوەی خود” لە لایەن بەڕێز “د.زانا احمد قادر” پێشکەشکرا. ئەم سیمینارە تایبەت بوو بە چۆنێتى و گرنگیی قەرەبووکردنەوەی خود لە کاتی زەرەرمەندبوونی جەستە و دەرووندا، هەستانەوەی دوای کەوتن و دوبارە بوونیادنانەوەی خود. 

لە چەند ساڵى ڕابردوودا، خەڵکى کوردستان ڕووبەڕووی چەندین ڕووداو و هەواڵى ناخۆش و بێزارکەر بوونەتەوە کە هەندێکیان جیهانى و هەندێکیش هەرێمیی بوون. بێگومان منداڵانیش چ بە بینین، یان بیستن یاخود هەستکردن، بەشى خۆیان لەم کاریگەرییە بەرکەوتووە. پرسیارە سەرەکییەکە ئەوەیە، چۆن ھەڵسوکەوتى تەندروست لەگەڵ منداڵەکانمان بکەین لە کاتی بارودۆخی ناخۆشدا و چۆن وەڵامی ئەو پرسیارانە بدەینەوە کە لە لایان دروستدەبێت؟ بۆ تاووتوێکردنی ئەم بابەتە هیوا فاوندەیشن لە بەرواری (١٣\٢\٢٠٢٠)دا سیمینارێکی بە ناونیشانى “چۆنێتیی مامەڵەى تەندروست لەگەڵ فشارە دەروونییەکان” ڕێکخست بۆ بەڕێز “د. فەهمی عەلی”، پسپۆڕی نەخۆشییە دەروونییەکان و مامۆستای زانکۆ، بۆ بەشێک لە بەشداربووانی گرووپی پاڵپشتی پڕۆژەی خێزانەکەم.