پڕۆژەى “خوێندنەوە وەک ئامڕازێک بۆ بەرزکردنەوەى ئاستى هۆشیاریی”

یەکێک لە ئامانجەکانى هیوا فاوندەیشن بریتییە لە بڵاوکردنەوەى کولتوورى خوێندنەوە لەناو کۆمەڵگاى کوردەوارییدا. بە مەبەستى هێنانەدیی ئەم ئامانجە گرنگ و پێویستەش، ڕێکخراوەکەمان زنجیرەیەک کۆڕ، سیمینار و ۆرکشۆپى لە قەزا و ناحیەکانى دەوروبەرى شارى سلێمانى ڕێکخستووە.

زنجیرە چالاکییەکانى خوێندنەوە و تاوتوێکردنى کتێبى “یاساکانى دایک، یاساکانى باوک“

هیوا فاوندەیشن، بە هاوکاریی ڕێکخراوى خەڵک بۆ گەشەپێدان، چالاکییەکى سێ مانگیی ڕێکخست بۆ ناساندن، خوێندنەوەى و شیکردنەوەى کتێبى “یاساکانى دایک” و “یاساکانى باوک” دەڤەرى ڕاپەڕیشنیش وەک یەکەم شوێنى ئەزموونکردنى چالاکییەکە هەڵبژێردرا کە لە چوار بەروار و لە چوار شوێنی جیاوازدا چالاکییەکە بەڕێوەچوو: باخچەى ساوایانى ناسک لە چوارقوڕنە، باخچەى ساوایانى ئەژى لە ڕانیە، باخچەى ساوایانى هەسێر لە حاجیاوا، باخچەى ساوایانى گلێنە لە قەڵادزێ. دایکان و باوکان پێشتر کتێبەکانیان بە دیاریی پێبەخشرا. پاشان لە کۆڕێکى کراوەدا کتێبەکان بەکۆمەڵ خوێنرانەوە و ناوەرۆکەکانیان لەلایەن بەشداربووانەوە بەشێوەیەکى چالاکانە تاوتوێ کران.

ئەم پڕۆژەیە هاندەرێکى سەرەکى دەبێت بۆ بەکولتوورکردنى خوێندنەوە لەسەر ئاستى خێزان. لە هەمان کاتیشدا هەوڵێکە بۆ تێڕوانینى ئەرێنییانەى مرۆڤەکان بەرامبەر بە یەکتر و وانەى هەماهەنگى و چارەسەرکردنى کێشە و گرفتە خێزانییەکان بە خوێنەرانى دەڵێتەوە. لەم پڕۆژەیەدا جەخت لە گیانى لێبوردەیى و یەکترقبووڵکردن دەکرێتەوە، بۆئەوەی ئەم خەسڵەتانە ببن بە بنەماى پێکەوه‌ژیانى خێزانەکان و ئەمەش لە پەروەردەى منداڵاندا ڕەنگبداتەوە. بە بۆچوونی ئێمە منداڵى تەندروست تەنها لە خێزانێکى تەندروستدا نەشونما دەکات؛ ئاشتیى و ئارامیی کۆمەڵگاش پەیوەندییەکى ئۆرگانیی بە خێزانى تەندروستەوە هەیە. 

زنجیرە چالاکییەکانى خوێندنەوە و تاوتوێکردنى کتێبى “حەوت خووەکەى کەسانى پێشەنگ“

لە پڕۆژەیەکى هاوشێوەدا، هیوا فاوندەیشن بە هاوکاریی لەگەڵ ڕێکخراوى خەڵک بۆ گەشەپێدان، چالاکییەکى سێ مانگەیان بۆ خوێندنەوەى بەکۆمەڵ و تاوتوێکردنى کتێبى “حەوت خووەکەى نەوجەوانانى پێشەنگ” دەستپێکرد. چالاکییەکە ئەم شوێنانەى گرتەوە: هەڵەبجەى شەهید، چەمچەماڵ ــ شۆڕش (دوو کۆڕ) و پێنجوێن (دوو کۆڕ). 

ئەم کتێبە لەلایەن نووسەرى بەناونگ “شین کۆڤى“یەوە نووسراوە و هیوا فاوندەیشن کارى وەرگێڕان و چاپى بۆ کردووە. مەبەستی سەرەکیی ئەم پڕۆژەیە بریتییە لە بەئاگاهێنانەوەى گەنجان لە خووەکانیان و چۆنێتیی جیاکردنەوەى خووە ئەرێنییەکان و شێوازى گەشەپێدانیان.